Jarl Wåge er ein røynd spaltist og forteljar. No debuterer han også som lyrikar med diktboka «Lappeteppe», som gis ut på Publica.

Engasjert debattant

Wåge er opphaveleg frå Nordfjord, men har lenge budd i Stavanger. Han er en pensjonert lærar som beskriv seg sjølv som vandrar, skribent og samfunnsdebattant. Han har vore spaltist i Fjordenes Tidende, Dagsavisen og Dagbladet og bidratt som morgonkåsør i NRK P2.

Som forteljar har han også deltatt i konkurransen StorySlam, der han i 2016 vann den store finalen, Grandslam, på Rockefeller. Han har også turnert med forestillingane «Vandrehistorier» og «Fleire hundre kilometer med forteljingar». Han har i tillegg gitt ut fagboka «Samliv, seksualitet, HIV og aids».

Skriveutfordring på Twitter

– Eg har alltid vore glad i lyrikk og juksa i faget i fleire tiår, fortel Wåge. – Men det meste kom aldri lenger enn til skrivebordsskuffen. Eg er ivrig på Twitter og har meir enn 15 000 følgjarar. Der oppdaga eg emneknaggen #nynov. Kvar månad blir det lagt ut eit ord som må med i ei kortnovelle eller et dikt. Det beste bidraget får heiderleg omtale.

– Det inspirerte meg til å prøve. Etter kvart blei det mange dikt. Så mange at eg bestemte meg for å samle dei og sende dei, saman med andre, tidlegare dikt, til Publica. Og der fekk eg jammen meg snøret i botn, fortel Wåge.

Eit lappeteppe av dikt

«Lappeteppe» er ei allsidig bok, noko tittelen også antydar. – Det er vel ikkje ei bestemt handling eller eitt tema i boka, fortel forfattaren. – Det er oftast ikkje det i lappeteppe. Det er vel eit bilde av ulike sider, opplevingar og refleksjonar av livet mitt. Eg har inga bestemt målgruppe, men eg håper alle kan finne dikt som rører dei her. Som tidlegare norsklærar tenkjer eg at fleire av dikta kunne vore god øving i diktanalyse for elevar i vidaregåande skule.

– Boka skil seg ut frå andre med ei nydeleg forside. Dessutan er det fjorten flotte bilde som familiemedlem har bidratt med. Mange av dikte er korte og finurlege, noko som eg trur pirrar lesaren. Å gje ut diktsamling er ganske skummelt, spesielt fordi dikt er så utleverande. Difor har det gjort veldig godt å få mange reaksjonar der folk fortel at boka har rørt dei og gjort inntrykk.

Fleire prosjekt

Wåge har ikkje tenkt å gje seg med skrivinga med det første – Eg har fleire prosjekt på gong. Sidan det eigentleg er forteljar eg er, har eg levert frå meg eit manus med forteljingar. Og eg hadde aldri trudd at det skulle skje igjen, men eg er jammen i gong med ei ny diktsamling også.

Vi gler oss!

Klikk her for å lese eit utdrag eller kjøpe boka.